Awor ku gobièrnu di Kòrsou a tuma medidanan pa prevení COVID-19, a surgi diferente pregunta tokante e posishon di un trahadó en relashon ku su doño di trabou. Kual ta bo derechinan laboral durante e pandemia akí? Nos di Asosashon Tienda di Lei ke klarifiká algun pregunta. 

Un trahadó por wòrdu kitá for di trabou si e ta infektá ku COVID-19? 

Konforme leinan laboral di Kòrsou un doño di trabou no por kita un persona enfermo ku COVID-19 (arbeidsongeschikt) for di trabou. Por desviá for di esaki den un CAO.

Na momentu ku un doño di trabou ke terminá un kontrakt di trabou (opzegging) e mester pidi pèrmit pa hasi esaki serka direktor di ministerio di desaroyo social, labor i bienestar (SOAW). Den kaso ku e persona ta enfermo, SOAW lo no duna pèrmit pa kita e trahadó enfermo for di trabou.

Den kaso ku e trahadó permanese enfermo na kas pa mas ku un aña, e ora ei si e doño di trabou lo por pidi i haña pèrmit serka direktor di SOAW pa kita e trahadó enfermo for di trabou.

Un trahadó ku ta infektá ku COVID-19 tin derechi riba salario durante su enfermedat? 

Konforme e leinan laboral di Kòrsou un trahadó wòrdu infektá ku coronavirus tin derechi riba 100% di su salario pa un tempu relativamente kòrtiku.

Mayoria bia den korte huesnan ta dikta ku e tempu relativamente kòrtiku ariba menshoná ta 6 siman. Den kaso ku tin sirkunstansianan spesial, korte por disidí ku e tempu akí ta mas largu.

Tuma nota: Partidonan por kombení algu otro; sinembargo esaki mester sosodé por eskrito (por ehèmpel den kontrakt of reglamentu)

Den kaso ku bo kontrakt no tin nada reglá tokante malesa, bo tin derechi riba 100% di bo salario.

Un doño di trabou por obligá su trahadonan keda keda kas durante e pandemia di COVID-19 i ki konsekuensha esaki tin pa su salario?

Un doño di trabou tin e deber di protegé su trahadónan. Esaki tambe ta enserá ku e por pidi e trahadónan pa keda of traha na kas.

Durante e temporada ku e trahadó mester keda of traha na kas, e trahadó tin derechi riba su salario kompleto konforme su kontrakt laboral. Esaki por ta diferente si den e kontrakt laboral tin un clausa di kalamidat. 

Kiko mi por hasi den kaso ku mi a keda sin salario of entrada dor di e medidanan tumá den kuadro di coronavirus?

Den kaso ku un persona keda sin salario of entrada dor di e medidanan tumá den kuadro di coronavirus e por tuma kontrakt ku e number di ayudo i sosten di ministerio di SOAW. E number di telefòn ta: +5999 510 7629.

E mensahe mester inkluí nòmber, fam, number di telefòn, e-mail i e lugá di trabou.  

Asosashon Tienda di Lei ta un asosashon di studiantenan di lei na University of Curaçao. Aunke nos ta prepará tur nos konsehonan ku koutela, nos no ta para responsabel pa e kontenido di e artíkulo akí. Si bo tin kualke pregunta, tuma kontakto ku nos na info@tiendadilei.com.