Ora dos persona kasa na Kòrsou outomátikamente nan ta kasa ku komunidat di bien, ku eksepshon si nan bai un notario i laga esaki traha un akta notarial kaminda nan ta separá nan biennan.

Un kumunidat di bien ta konsistí di tur e biennan i e debenan/obligashonan di tantu e esposo komo e esposa na momentu ku nan kasa i tur biennan i debenan/obligashonan ku e pareha optené durante di matrimonio. Riba e regla akí tin sierto eksepshon. For di e komunidat di bien ta kai por èhèmpel biennan òf debenan/obligashonan ku e esposonan risibí for di herensia òf biennan i debenan/obligashonan ku ta apegá na un di e esposonan (na hulandes: “verknochte zaken”). Biennan apegá na un di e esposonan ta por èhèmpel, kompensashon pa daño inmaterial (na hulandes: “smartegeld”) òf penshun di invalides (na hulandes: “invadiliteitspensioen”).

Por èhèmpel, Alex i Karina a kaba di kasa. Promé ku e matrimonio Alex a risibí un kas di herensia serka su tata. Aparte di esei Alex tin un outo i un debe di estudio. Karina na e otro banda tin kuenta di spar abundante, un outo i e ta risibí kompensashon pa daño inmaterial.

Na momentu ku Alex i Karina a kasa e outo i e debe di estudio di Alex i e outo i sèn riba e kuenta di spar di Karina ta forma parti di e komunidat di bien.

E kas ku Alex a risibí di herensia serka su tata i e kompensashon ku Karina ta risibí pa daño inmaterial ta kai for di e komunidat di bien. Si dado kaso Alex i Karina lo mester divorsiá, e dos biennan akí no mester wòrdu partí.

Un komunidat di bien ta terminá na momentu ku:

  1. un di e esposonan fayesé;
  2. un di e esposonan (òf tur dos) entregá un petishon pa divorsio;
  3. un di e esposonan (òf tur dos) entregá un petishon pa separashon di mesa i kama (na hulandes: “scheinding van tafel en bed”);
  4. un di e esposonan (òf tur dos) entregá un petishon pa elevashon (na hulandes: “opheffing”) di e komunidat di bien;
  5. na momentu ku un di e esposonan ta perdí i hues dikta ku tin un sospecho legal ku e esposo konserní a fayesé (na hulandes: ”rechtsvermoeden van overlijden”); òf
  6. na momentu ku e kondishonan di matrimonio (na hulandes: “huwelijkse voorwaarden”) ku a wòrdu trahá despues di matrimonio wòrdu elevá.

Ora ku un komunidat di bien terminá kada un esposo tin mesun tantu derechi riba e biennan komun. Huntu e partidonan por disidí di repartí e biennan i hinka esaki den un kontrakt por eskrito (na hulandes: “schriftelijke vaststellingsovereenkomst”) òf nan por bai un notario òf hues ku lo repartí e biennan i e debenan/obligashonan.